أمس الضحى عديت راس النبا فوق
راس الطويل اللي به الريح نسناس
لا بان لي غيمٍ ولالاح لي بــروق
والآدمـي مخلوق له قلب وإحساس
وهب الشمالي براس عالي ومرموق
مرقاب من دونــه يضيقن الأنفاس
عديت مرقابه وأنـا بغـاية الشـوق
شوقٍ بقلبي ما له حــدود وقياس
أقنب قنيب الذيب وآلـوب و أتـوق
ذيبٍ يجر من العوى عقـب الإفلاس
وإلا صويبٍ طـاح بالسـاق مصفوق
خلوه ربعـه وأد بحوا حين الادماس
عيني تـذارف دمعها واحـرق الموق
وكثرت هواجيسـي وزاد التهوجاس
الـزاد مـن كثر الهوا جيس مـا ذوق
وقمت أتلفت كــن ما حولي أوناس
ولا كل صـديقٍ لـو تثق فيه ماثـوق
لا صار ماتبنـى الصداقة على ساس
كم من صديقٍ ينقذك و أنت مزنوق
وكم من صديــقٍ بان خاين ودلاس
يا لله يلي يقصدك كـل مخلــوق
يا حي يا محيــي الرمايم والأرماس
تفرج لمن قلبه من الوجد محروق
حرق الهشيم اللي احترق عقب ما قاس
من كثر ما بالقلب ضايق و مرهوق
أوكـن يطـــرق داخل القلب نحاس
ما جت له الدنيا على الكيف والذوق
ولازال وقتـــــه للآمـال عكاس
يصبر ولا بالصبر تجديـد ووفـوق
يصبح ويمسي وحـالته وصلت اليأس
عل وعسى يصفي لك الوقت ويروق
والوقت يأتــي به مسـرات وإتعاس
ما دمـت حي ودام لك يـوم مفهوق
فابعـد عـن دروب المعايب والأدناس
سـدك بقلبك لـو تحـطه بصنـدوق
فأنت على سـدك وكيـــلٍ وحراس
وان بحت سدك فأنت مخطي ومحقوق
غير الندامــة و المـلامة من الناس
أحدٍ كلامه عند ألأقـوام مصـدوق
وأحدٍ لـــو انه صادقٍ قيل هلاس
وأحدٍ سبق و أحدٍ يقولـون مسبوق
وأحدٍ على قــده مع الناس لاباس
وأحدٍ يقدر لـو لبس ثـوب مشقوق
الناس واحــد لكن أفعالها أجناس
وبين الردي والجيد ميزات وفـروق
فرقٍ بعيـــد ولا يتساوى بمقياس
ولا كل هرجٍ يعجب الـناس و يلوق
الناس لــو طاوعتها جاك وسواس
يا راكب اللي تو ما طـب بالسـوق
يجتاز عسرات الصحاري والاطعاس
حسب الطلب ما قيل به خدش ودقوق
عليــه من زين الملامح تقل ماس
وسواق ضاري للمشاوير و السـوق
ألفين كيلو مالفت عينـــه انعاس
يقطع مسافـاتٍ بعيدات و طــروق
في سهلةٍ من دونها الشوف ينحاس
ملـفاه دارٍ حيل مـن دونها عــوق
كالطيـــر كنه على القاع ماداس
دارٍ لها بالقلب ونات وخفــوق
و يحـن لها قلبي مثل حن الأجراس
قلبي لها عاشق وهي له معشوق
وان قيل بوس ترابهــا قلت ينباس
عساك ياسيلٍ من المزن مـدفوق
تـروي فياضٍ من سنا القيض يباس
تنبت بها الأشجار ووراقها تسوق
ونلقــى بها النوار والعشب محتاس
ريح البختري يطرب البال ويشوق
و تشبع بها الحيران مع قب الأفراس
وليا شبعـت حيرانها تشبع النوق
مـن عقب ما هن ضمرٍ مثل الأقواس
ونلقى الزبيدي طالعٍ تقل غـرنوق
و أيضا الجباه وطيـب الفقع وغلاس
ومن عقب ذا يا فاهم العلم بوثوق
عسـاك تسلم مـن عنا الوقت والبأس
خذلي سـلامٍ بالتحيات مرفــوق
ما قلت و مـا خطت يميني بقر طاس
للي غـلاهم داخـل القلب بعـروق
يجـري مجاري الدم في كل الأحواس
الرجل ما هو جسم قلبٍ و منطوق
وفعلٍ تميز بــه وشيمة ونوماس
مأمون تأمن به من الغدر والبوق
مثل العلم فــي قمة المجد نبراس
ماهمه الدنيا و كل حي مـرزوق
والطيب هـو والمرجلة يرفع الرأس
وختامها صلوا على خير مخـلوق
نبينا خيــــر الملا طيب الساس
